ହୃଦୟ ହଜେଇ ଖୁସିରେ କାନ୍ଦୁଛି

              କାବ୍ଯଭୂଷଣ ଶିବ ପ୍ରସାଦ ବାହିନୀପତି   

ଏକା ଥିଲି ଯେବେ ମୁଁ ଭଲରେ ଥିଲି 

କାହିଁ ମୁଁ ପ୍ରିୟା ତୋତେ ଭଲପାଇଲି ।

ଭଲପାଇ ନିଜେ ନିଜକୁ ଠକିଛି

ହୃଦୟ ହଜେଇ ଖୁସିରେ କାନ୍ଦୁଛି । ୧

ହୃଦୟ ଦେଇ ମୁଁ କରିଥିଲି ପ୍ରେମ

ତା' ପ୍ରେମ ତ ମୋ' ପାଇଁ ହେଲା ସପନ । 

ପ୍ରେମ କରି ନିଜେ ନିଜଠୁ ହାରିଛି

ହୃଦୟ ହଜେଇ ଖୁସିରେ କାନ୍ଦୁଛି । ୨

ଦେଖାଇଲୁ କେତେ ତୁ ମିଠା ସପନ

ଦିବସେ ପ୍ରେୟସୀ ମୁଁ ଦେଖିଲି ଜହ୍ନ । 

ମିଛ ଜହ୍ନ ଦେଖି ବହୁତ କାନ୍ଦିଛି

ହୃଦୟ ହଜେଇ ଖୁସିରେ କାନ୍ଦୁଛି । ୩

ସାତ ଜନମକୁ ସାଥୀ ହେବୁ ବୋଲି 

ଦେଇଥିଲୁ କଥା ଗଲୁ କି ତୁ ଭୁଲି !!!

ଭାବି ତୋର କଥା ଲୁହ ମୁଁ ଢ଼ାଳୁଛି

ହୃଦୟ ହଜେଇ ଖୁସିରେ କାନ୍ଦୁଛି । ୪

ଅଧାବାଟେ ମୋର ହାତ ଛାଡ଼ିଦେଲୁ

ବଞ୍ଚି ଥାଉ ଥାଉ ମାରିଦେଇ ଗଲୁ ।

ଥିଲା କେଉଁ ଅପରାଧ କହିବୁକି ?

ହୃଦୟ ହଜେଇ ଖୁସିରେ କାନ୍ଦୁଛି । ୫

ଶୋଇଛି ମୁଁ ଦୁଃଖ କୋକେଇ ଉପରେ

ଜଳୁଛି ଆଜି ମୁଁ ବିରହ ଜୁଇରେ । 

ବିରହ ସଙ୍ଗୀତ ଆଜି ମୁଁ ଗାଉଛି

ହୃଦୟ ହଜେଇ ଖୁସିରେ କାନ୍ଦୁଛି । ୬

ବାସର ରାତିରେ ପୁଷ୍ପ ଖଟିଆରେ

ବସିଥିବୁ ପ୍ରିୟା କାନ୍ତ ଅପେକ୍ଷାରେ । 

ଏଠି ମୁଁ ମୃତ୍ୟୁର ପ୍ରତୀକ୍ଷାରେ ଅଛି

ହୃଦୟ ହଜେଇ ଖୁସିରେ କାନ୍ଦୁଛି । ୭

ତୁ ଶୋଇଥିବୁ ଲୋ ଗୋଲାପ ଶଯ୍ଯାରେ

ମୁଇଁ ଶୋଇଥିବି ଚ଼ିରା ମସିଣାରେ ।

ହସୁଥିବୁ ତୁ ମୁଁ ନିରବ ରହିଛି

ହୃଦୟ ହଜେଇ ଖୁସିରେ କାନ୍ଦୁଛି । ୮

ତୁଇ ବସିଥିବୁ ପଲଙ୍କ ଉପରେ

ମୁଇଁ ଶୋଇଥିବି କାଠ କୋକେଇରେ । 

ଆଜିଠୁ ରଖିଛି କୋକେଇ ସାଇତି

ହୃଦୟ ହଜେଇ ଖୁସିରେ କାନ୍ଦୁଛି । ୯

ଚ଼ାଲିଗଲୁ ଟିକେ ଭାବିଲୁ ନାହିଁ 

ତୋ' ବିନା ମୋର ଆଉ କେହି ତ ନାହିଁ ।

ଏକା ଥିଲି ମୁଁ ଆଜି ବି ଏକା ଅଛି

ହୃଦୟ ହଜେଇ ଖୁସିରେ କାନ୍ଦୁଛି । ୧୦

ଭଲପାଉଥିଲି ପାଉଛି ଆଜି ବି 

ଜୀବ ଥିବା ଯାଏଁ ଭଲପାଉଥିବି ।

ଭୁଲି ନାହିଁ ବୋଲି ଲୁହ ମୋ' ଝରୁଛି

ହୃଦୟ ହଜେଇ ଖୁସିରେ କାନ୍ଦୁଛି । ୧୧

ଆଖିର ଲୁହକୁ ଓଠରେ ପିଇବି

ଜିଇଁ ଜିଇଁ ପଛେ ନିତି ମରୁଥିବି । 

ମରି ମରି ପରା ଏବେ ବି ବଞ୍ଚିଛି 

ହୃଦୟ ହଜେଇ ଖୁସିରେ କାନ୍ଦୁଛି । ୧୨

ଲୁହ ପିଇ ପିଇ ତୋ' ସୁଖ ଦେଖିବି

ତୋ' ସୁଖ ଦେଖି ମୁଁ ଖୁସିରେ କାନ୍ଦିବି । 

ଶେଷ ଇଛା ମୋର ଏତିକି ରହିଛି 

ହୃଦୟ ହଜେଇ ଖୁସିରେ କାନ୍ଦୁଛି । ୧୩

ଦୋଷ ଥିଲେ ମୋର କ୍ଷମା କରିଦେବୁ

ମା' ମଙ୍ଗଳା ତୋତେ ସାହା ହୋଇଥା'ନ୍ତୁ ।

ବିଦାୟ ଦେ' ପ୍ରିୟା ଏବେ ମୁଁ ଯାଉଛି 

ହୃଦୟ ହଜେଇ ଖୁସିରେ କାନ୍ଦୁଛି । ୧୪

     ଭାଟପଡ଼ା,ନିରାକାରପୁର,କଣାସ,ପୁରୀ