ଗଙ୍ଗା ତୁମେ କେଉଁଠି ?

*****************

କାବ୍ଯଭୂଷଣ ଶିବ ପ୍ରସାଦ ବାହିନୀପତି 

**************************

ହେ ଗଙ୍ଗା !

ତୁମେ କେଉଁଠି ?

କେଉଁ ଅଜଣାଞ୍ଚଳେ ହୃତ ହୋଇଲ?

ଖୋଜି ବି ପାଉନି ତୁମକୁ।

ସମ୍ପର୍କରେ ତୁମେ ଜ୍ଯେଷ୍ଠ ବୋଲି 

ଯା' ଇଚ୍ଛା ତା' କରିବ ନା କ'ଣ !

କାହାରିକୁ କିଛି ନଜଣେଇ

ହଠାତ୍‌ ଉଭାନ୍‌ ହୋଇଗଲ !

ଆମେ ଦୁଇ ଭାଇ ଦୁଇ ସାଙ୍ଗ ଭଳି

ଅତି ଘନିଷ୍ଠ ସମ୍ପର୍କ କାହାର

ନଜର ଲାଗିଲା କେଜାଣି

ସମ୍ପର୍କରେ ଆଙ୍କି ହୋଇଗଲା

ବହଳିଆ ଲମ୍ବା ପୂର୍ଣ୍ଣଚ୍ଛେଦଟିଏ । 

ତୁମ ସହ ମୋର ଶେଷ ଦେଖା

ସାଲେପୁର ଯିବାକୁ ଦି'ଦିନ ବାକି

ବାସ୍‌, ସେତିକି

ଆଉ ଦେଖା ହୋଇନି ତୁମ ସହିତ ।

ସାଲେପୁର ଯାତ୍ରାରୁ ଫେରିବା ପରେ

ମେଡିକାଲରେ ଆଡ୍‌ମିଟ୍‌ ଖବର

ବ୍ଯଥିତ କରିଦେଲା ମୋ ତନୁମନ

ଶିହରି ଉଠିଲା ମୋ ସର୍ବାଙ୍ଗ ।

ପୁନରାୟ ଦୁଇ ଦିନ ପରେ

ତୁମେ ଚାଲିଯିବାର ଖବର

ମଡମଡ କରି ଭାଙ୍ଗିଦେଲା

ମନର ଶଲ୍ଯ ସବୁକୁ ମୋର।

ହେ ଗଙ୍ଗା ତମେ କୁଆଡେ ଗଲ ?

କି ପ୍ରକାର ଏ ଅଭିମାନ ତୁମର ?

କେଉଁ ଅପରାଧର ଏ ଶାସ୍ତି ?

ମୋତେ ନହେଲା ନାହିଁ ପଛକେ

ବାପଘର ସ୍ମୃତି ଭୁଲି ନଥିବା

ଶାଶୁଘର ଘରକରଣା 

ଶିଖି ନଥିବା ସହଧର୍ମିଣୀକୁ ବି

ନିଃସ୍ବ କରି ଚାଲିଗଲ ତୁମେ !

ଭଲଭାବେ ଦୁନିଆ ଦେଖି ନଥିବା 

ଏଡିକି ବକଟେ ଅଜ୍ଞାନ ବାଳୁତ 

କିପରି ଛିନ୍ନ କଲ ତୁମ ପିତୃତ୍ୱ ?

କିଏ ବା ହେବ ତାଙ୍କ ସାହାରା ?

ଏ କେଉଁ ମହାନତାର ପରିଚୟ ?

ମିଳିଗଲା କି ମନକୁ ଶାନ୍ତି !

ହେ ଗଙ୍ଗା  !

ମୁଁ ଉତ୍ତର ଚାହେଁ ।

ଆଜି ଛୁଟୁଛି ଅଶ୍ରୁ ନିର୍ଝର 

ଦୟା ଧାର ମକରା ସୈକତ

ପନ୍ଦର ପଲ୍ଲୀରେ ଦୟନୀୟ ବନ୍ଯା

ପଲ୍ଲୀବାସୀ ଓଷ୍ଠ ଧାରୁ ହୃତ ହସ ।

କଣାସ ମାଟିର କୋଣେ ଅନୁକୋଣେ

ତୁମ ନିଖୋଜ ବାର୍ତ୍ତା ପ୍ରାପ୍ତ ମାତ୍ରେଣ

ଲୋତକ ବାରି ଖର ସ୍ରୋତକୁ

ରୋକିବାକୁ କୁହ କାହାର ସକ୍ଷମ ?

ବନ୍ଯା ବିଭୀଷିକା  ଭସାଇ ନେଲାଣି

ତୁମ ନିଜ ହାତେ ଗଢ଼ିଥିବା

ତୁମର ମହାବୀର ଯୁବକ ସଂଙ୍ଘ

ଭାସିଗଲେଣି କର୍ମକର୍ତ୍ତା ସମୂହ ।

ହେ ଗଙ୍ଗା  !

ଆସି ଦେଖିଯାଅ କେମିତି ଏ ବନ୍ଯା

କ୍ଷୟକ୍ଷତି କରି ସାରିଲାଣି 

କେତେ କେତେ ହୃଦୟ ନିଳୟ  ।

ତୁମ ଲ।ଗି ସୃଷ୍ଟି ଏହି ବନ୍ଯା

ପୋଛିପାଛି ଧୌତ କରିସାରିଲାଣି 

କେତେ ପଲ୍ଲୀ ବାସିନ୍ଦାଙ୍କ ହସଖୁସି

ସ୍ବଚକ୍ଷୁରେ ଦେଖିଯାଅ ଥରେ ।।

***********************     

         ସମ୍ପାଦକ -ଉଦୟ ଭାନୁ 

ଭାଟପଡ଼ା,ନିରାକାରପୁର,କଣାସ (ପୁରୀ)

ଯୋଗାଯୋଗ- ୮୯୧୭୪୮୦୫୩୬