ହୁଅନ୍ତୁ ଶୁଣିମା

        କାବ୍ଯଭୂଷଣ ଶିବ ପ୍ରସାଦ ବାହିନୀପତି      

                                     ସମ୍ପାଦକ - ଉଦୟ ଭାନୁ 

++++++++++++++++++++++++

ଶ୍ରୀକ୍ଷେତ୍ର ସାମନ୍ତ       କରୁ ପ୍ରଣିପାତ 

          କର ବାରେ କର୍ଣ୍ଣପାତ 

କଳ୍କୀ ଅବତାର       କରୋନା ବେମାର

           ଉପୁଜାଏ ବିତିପାତ ।

         କାଳ କରେ କୋଳାଗ୍ରତ ;

 ନ ଚାହିଁଲେ ତୁମେ       କି କରିବୁ ଆମେ

             ପ୍ରାର୍ଥୁ ପ୍ରଭୁ ପାଦଗତ ।

    ଏ ସାରା ଭୁବନ       ଆମ ପରିଜନ

           ସର୍ବେ ଆମେ ଭାଇ ଭାଇ

  ଦେଖି କାଳ ଗ୍ରାସ       ଉଠେ ଦୀର୍ଘ ଶ୍ବାସ

            ବିଷାଦ ଆସେ ଘନେଇ ।

           କାହାକୁ ସେ ଛାଡ଼େ ନାହିଁ ;

      ପାଚିଲା ପତର       ଥାଇ ଦଣ୍ଡଧର

              କଞ୍ଚାକୁ ଦିଏ ଝଡ଼େଇ ।

     ଧନୀ ଗରିବର       ରଖେନା ବିଚାର

            ବୁଝେନା ସେ ସୁଖ-ଦୁଃଖ 

      ରକ୍ଷାକର୍ତ୍ତା ହୋଇ       ସୁରକ୍ଷା ଇଚ୍ଛଇ

             ଧନୀ ଉଦରେ ବି ଭୋକ ।

              ଉପାୟଶୂନ୍ଯ ଏ ଲୋକ ;

      ମହାମାରୀ ଭୀତି       ହର ଲକ୍ଷ୍ମୀପତି

               ବିତ୍ପାତରୁ କର ମୁକ୍ତ  ।

     ଏତିକି ପ୍ରାର୍ଥନା       କର ବାରେ ଘେନା

               ବିଶ୍ବେ ଦିଅ ଆରୋଗ୍ଯତା

     ତୁମ୍ଭେ ଥାଉଁ ଥାଉଁ        ଆହେ ମହାବାହୁ 

               କାହିଁ ଆମ୍ଭ ବିଷାଦତା ।

               ତୁମ୍ଭେ ପ୍ରଭୁ ରକ୍ଷାକର୍ତ୍ତା ;

       ହୁଅନ୍ତୁ ଶୁଣିମା        ଗୁହାରି ମଣିମା

              ଆମ୍ଭ ନୈବିଦ୍ଯର ବାର୍ତ୍ତା ।

🌀ଭାଟପଡ଼ା , ନିରାକାରପୁର , କଣାସ , ପୁରୀ🌀