ପାର୍ଥ ବିଳାପ

 

                       ପାର୍ଥ ବିଳାପ 

                  **************

              ଶିବ ପ୍ରସାଦ ବାହିନୀପତି 

ମୋ' କୋଳର ରତନ     ସୁଭଦ୍ରାର ନନ୍ଦନ 

          ଫେରିଆସ ମୋର କୋଳେ

ଶୂନ୍ଯ ପଡ଼ିଛି ତୋ'     ମାଆର ପଣତରେ

          ନୟନୁ ମୋ' ଅଶ୍ରୁ ଝରେ ।

           ତୁ ମୋର ଗଳାର ହାର 

       ଝୁରେ ତୋତେ ମହାବୀରରେ ।୧।

ତୁ ଅତି ଛୋଟ ଥିଲୁ     ପଦାଘାତେ ତୋହର

             ଫଟାଉଥିଲୁ ମୋ' ବକ୍ଷ

ଦୁଷ୍ଟ ତୁ ହେଲେ ଧନ     କରୁଥିଲି ଶାସନ

          ଏବେ ହେଲି ଅଭିଶପ୍ତ ।

            ତୁ ମୋର ରଙ୍କରତନ

         ଡ଼ାକୁଛି ଏ ଅରଜୁନରେ ।୨।

ଆଦ୍ୟରୁ ବାରଣ ମୁଁ      କରୁଅଛି ତୋତେରେ

              ଯାଅନାହିଁ ରଣକ୍ଷେତ୍ର

ମୋ' ବାଳୁତ ନନ୍ଦନ      କରିବୁ ତୁ କି ରଣ

         ମାନିଲୁ ନାହିଁ ମୋ' ଗୀର ।

             ଆରେ ସୁନା ପସରା

      ତୋ' ବିନା ପ୍ରାଣ ଅସରାରେ ।୩।

କାପୁରୁଷଙ୍କ ପରି     ହତ୍ଯା କରିଲେ ତୋତେ

              ଭଙ୍ଗ କଲେ ରଣନୀତି

ଏକ ଯୋଦ୍ଧା ସଙ୍ଗତ     ମହାରଥୀ ସପତ

            ଯୁଝିଲେ ଏକତ୍ର ମାତି ।

         ଆରେ ମୋ' ଜୀବ ଜୀବନ

      ତୋ' ବିନା ମୁଁ ମ୍ରିୟମାଣରେ ।୪।

ଚ଼କ୍ରବ୍ଯୁହରେ ସିନା     ପଶିବା ତୋତେ ଜଣା

                ପ୍ରସ୍ଥାନ ପଥ ଅଜଣା

ଅପେକ୍ଷା ନକରିଲୁ     ତୁ ଅନଳେ ଡ଼େଇଁଲୁ

            ହୋଇଗଲୁ ବାଟବଣା ।

             ତୁ ମୋର ହୃଦ ଚ଼ନ୍ଦନ

       କାନ୍ଦେ ଆଜି ଏ ଅରଜୁନରେ ।୫।

କହିବି ମୁଁ କିପରି     ମା'ଙ୍କୁ ଯାଇ ତୋହରି

              କୁମର ତୁମର ନାହିଁ 

 ରଣଭୂମି ନିରେଖ     ପଡ଼ିଅଛି ତା' ଶବ

         ବୀରଗତି ପ୍ରାପ୍ତ ହୋଇ ।

          କଷଣ ଦେଲୁ ତୁ କାହିଁ

      କି ଦୋଷ କରିଲି ମୁହିଁରେ ।୬।

ଆଜି ତୁ ଫେରିଆସ      ବିଷାଦ ମୋ' ବିନାଶ

            ମୋ' ଅଙ୍କ କର ମଣ୍ଡନ 

     ମୁଁ ପାଣ୍ଡବ ତୃତୀୟ      କରେ ଅନୁନୟ

              ଦିଅନା ମତେ କଷଣ ।

               ତୁ ମୋ' ପିଣ୍ଡର ପ୍ରାଣ

          ସ୍ମରେ ଏ କୁନ୍ତୀ ନନ୍ଦନରେ ।୭।

 ଖୋଜୁଛି ମୋର ମନ     କାହିଁକି ତୁ ମଉନ

              କଥା କୁହ କଥା କୁହ

    ନିଦ୍ରା ବରଜି ଉଠ     ଏହିକ୍ଷଣି ତୁରିତ

          ପୋଛି ପକାଅ ମୋ' ଲୁହ ।

           ତୁ ମୋର ମୋତିର ହାର

        ବିଳାପେ ପିତା ତୋହରରେ ।୮।

କେସନେ ଗଲୁ ଛାଡ଼ି     ମତେ ତୁ ଏକା କରି 

          ମନେ କି ପଡୁନି ତୋର !

   ପାର୍ଥର ନିବେଦନ    ରଖନ୍ତୁ ଜନ୍ତୁରାଣ

            ଜୀବନ ପାଉ କୁମର ।

          ତନ୍ଦ୍ରା ତ୍ଯାଗି ଉଠ ବୀର     

       ତୋ' ସାହସକୁ ଜୁହାରରେ ।୯।

ଧନ୍ଯ ତୋର ବୀରତ୍ୱ     ଦେଖି ମୁଁ ହେଲି ପ୍ରୀତ

              ଗରବେ ପାର୍ଥ ଭାଷିଲା

  ଇତିହାସ ଫର୍ଦ୍ଦରେ     ତା' ନାମ ସ୍ବର୍ଣ୍ଣାକ୍ଷରେ

               ଲିପିବଦ୍ଧ ହୋଇଗଲା ।

                 କୁଳଚ଼ନ୍ଦ୍ରମାକୁ ଚ଼ାହିଁ

            ପ୍ରଣମେ ସୁଭଦ୍ରା ସାଇଁରେ ।୧୦।

            ଽଽଽଽଽଽଽଽଽଽଽଽଽଽଽଽଽଽଽଽଽଽଽଽଽଽଽଽଽଽ

                 ସମ୍ପାଦକ - ଉଦୟ ଭାନୁ 

      ଭାଟପଡ଼ା , ନିରାକାରପୁର , କଣାସ ,ପୁରୀ 

           ଯୋଗାଯୋଗ - ୮୯୧୭୪୮୦୫୩୬