ଧନ୍ଯ ତୁମ ସର୍ବଶିକ୍ଷା ଅଭିଯାନ

କାବ୍ଯଭୂଷଣ ଶିବ ପ୍ରସାଦ ବାହିନୀପତି 

      ସମ୍ପାଦକ - ଉଦୟ ଭାନୁ 

ଚଉଦିଗେ ଆଜି ଶୁଭୁଅଛି ଦେଖ

ସର୍ବଶିକ୍ଷା ଅନନ୍ତ ବିଜୟ ନାଦ

ସଭିଏଁ ପଢ଼ନ୍ତୁ ସଭିଏଁ ବଢ଼ନ୍ତୁ

ନୀତିରେ ଛାତ୍ରଛାତ୍ରୀ ଅନୁପ୍ରାଣିତ ।

ପାଠପଢ଼ା କଥା କିଏ ବା ପଚାରେ

ବିଦ୍ଯାଳୟେ ଛାତ୍ରଛାତ୍ରୀ ହନ୍ତସନ୍ତ 

ପାଠପଢ଼ା ବୋଲି କିଛି ନାହିଁ ଆଉ

ମିଛେ ଖାଲି ଏହି ନୀତି ପ୍ରଚଳିତ ।

ପିଲାଙ୍କୁ ଦିଅନ୍ତି ମଧ୍ଯାହ୍ନ ଭୋଜନ

ଭୋଜନ ନୁହେଁ ସେ ବିଷ ବୋଲି ଜାଣ

କାହାର ଭୁଲ୍‌ ଇଏ କାହାର ଠିକ୍‌ 

ଜାଣିଛି କିଏ ବା କରିବ ବଖାଣ ।

ଡାକ୍ତର ବୈଦ୍ଯ ଉଠାଉଛନ୍ତି ଲାଭ

ମନେ ମନେ ଭଜନ୍ତି ଚକାନୟନ 

ସବୁଦିନ ଚାଲିଥାଉ ଏହିପରି

ଦିବ୍ଯଦୃଷ୍ଟି ଟିକେ ଦିଅନ୍ତୁ ଆପଣ ।

ଧନ୍ଯ ସରକାର ତୁମର ପ୍ରୟାସ

କେମିତି ଗଢ଼ିଛନ୍ତି ନୀତି ଆପଣ ?

ଶିକ୍ଷା ବଦଳରେ ଯନ୍ତ୍ରଣା ମିଳଇ

ଧନ୍ଯ ତୁମ ସର୍ବଶିକ୍ଷା ଅଭିଯାନ ।

ଭାଟପଡ଼ା , ନିରାକାରପୁର ,କଣାସ , ପୁରୀ