ଶତବାର ସଲାମ

         ଶିବ ପ୍ରସାଦ ବାହିନୀପତି

      ବାହୁନି ବାହୁନି      ଭାରତୀ ଜନନୀ 

               କାନ୍ଦୁଛି ଫଟାଇ କଣ୍ଠ

       ନକର ଶୟନ      ବୀର ପୁତ୍ରଗଣ

            ଆଳସ୍ୟ ବରଜି ଉଠ । ୧

      ନିଦ୍ରା ପରିହରି      ତଳ୍ପ ତ୍ଯାଗ କରି

            ବେଗେ ଧର ବୀରବେଶ

      ଆତଙ୍କ କମାଣ      କଲାଣି ଗର୍ଜନ

            ନହୁଅ ଆଉ ଅବଶ । ୨

      ଅସ୍ତ୍ରର ଝଙ୍କାର      ତୋପର ଟଙ୍କାର 

              ବୋମା ତୁମୁଳ ଶବଦ

      ଫଟାଉଛି କାନ      ଉଠ ପୁତ୍ରଗଣ 

          କାହିଁକି ଭାଙ୍ଗୁନି ନିଦ ? ୩

       କରେ ଧର ଅସ୍ତ୍ର      ପିନ୍ଧି ଯୁଦ୍ଧ ବସ୍ତ୍ର 

               ଦେଇ ସମର ହୁଙ୍କାର

       ସତ୍ଯର ବିଜୟ      ପାଇଁ ଦିଅ ଲୟ

             ଗଡ଼ାଅ ଶତ୍ରୁର ଶିର । ୪

        ଅସ୍ତ୍ରର ଜବାବ      ଅସ୍ତ୍ରରେ ହିଁ ଦେବ

               ନୋଇଁବ ନାହିଁ ଆନନ

       ବଳବେଗ ନେଇ      ଯାଅ ତୁମେ ଧାଇଁ 

               ମାଡ଼ି ଆସନ୍ତି ସଇନ । ୫

       ଯେତେ ପରକାରେ      ଜନନୀ ହକାରେ

                  ଆଉ କି ଉଠନ୍ତି ପୁତ

        କୋଳ ଶୂନ୍ଯ କରି      କଲେ ହତଶିରୀ

               କାନ୍ଦଇ ଭାରତୀ ମାତ । ୬

        କୋଟି ଜନତାର      ନେତ୍ରେ ଅଶ୍ରୁଧାର

                 ବୀରଙ୍କ ମହାପ୍ରୟାଣେ

         ତରୁ-ଲତା-ତୃଣ       କରନ୍ତି ରୋଦନ

            ଛାଡ଼ି ଗଲେ ବୀର କେଣେ  । ୭

        ଆମ ଏ ଦେଶର      ଭାରତ ମାଟିର

                ଚିର ଜାଗ୍ରତ ପ୍ରହରୀ

         ଘେନ ଶତବାର      ସଲାମ ଆମର

             ସ୍ନେହ ପ୍ରେମର ପୂଜାରୀ  । ୮

                ସମ୍ପାଦକ - ଉଦୟ ଭାନୁ 

ପ୍ରତିଷ୍ଠାତା/ମୁଖ୍ୟ ସମ୍ପାଦକ -ସୁଦେଷ୍ଣା ପ୍ରମୋଦ ସାହିତ୍ଯ ସଂସଦ 

     ଭାଟପଡ଼ା, ନିରାକାରପୁର, କଣାସ (ପୂରୀ)

               ଫୋ- ୮୯୧୭୪୮୦୫୩୬