ଗଣେଶ ପୂଜା

କାବ୍ଯଭୂଷଣ ଶିବ ପ୍ରସାଦ ବାହିନୀପତି 

        ସମ୍ପାଦକ - ଉଦୟ ଭାନୁ

ଚତୁର୍ଦ୍ଦିଗେ ଶୁଭେ ଆଜି ବାଦ୍ଯଘୋଷର ଝଙ୍କାର

ଉତ୍କଳର ପୁରପଲ୍ଲୀ ଆଜି ଉତ୍ସବ ମୁଖର  ।

ଗ୍ରାମେ ଗ୍ରାମେ ଓ ନଗ୍ରେ ନଗ୍ରେ ସଙ୍ଗୀତର ମୂର୍ଚ୍ଛନା

ସବୁରି ଓଷ୍ଠରୁ ଝରିଯାଏ ହସ ଚୁନା ଚୁନା ।

ବିଦ୍ଯାଳୟ ପ୍ରାଙ୍ଗଣରେ ଆଜି ଛାତ୍ରଛାତ୍ରୀଗଣ

ଶିକ୍ଷକ ସମେତ ସଭିଙ୍କର ଉଲ୍ଲାସିତ ମନ ।

ପ୍ରତି ଗ୍ରାମେ ପ୍ରତି ନଗ୍ରେ ଆଜି ପୂଜାର ଆସର

ଝଲସୁଛି ଶୋଭା ଦେଖ ଆମର ଗାଁ ସାହି ମେଢ଼ ।

ଥାଟେ ଥାଟ ସଜା ହୋଇଛି ନାନାଦି ଆଭୂଷଣେ

ଭକ୍ତିର ରସରେ ଆପ୍ଯାୟିତ ଆଜି ନରଗଣେ ।

ନବ ବସ୍ତ୍ର ନବ ବେଶରେ ଉତ୍‌ଫୁଲ୍ଲିତ ମନେ

ଭକ୍ତି ରସ ବର୍ଷିଯାଏ ଏଇ ଉତ୍କଳ ଭୁବନେ ।

ସହର୍ଷ ବଦନେ ସରବେ ହୁଅନ୍ତି ଆତଯାତ 

ଆବାଳ ବୃଦ୍ଧ ବନିତା ଆଜି ସର୍ବେ ଆନନ୍ଦିତ ।

ନାନାଦି ଆଲୋକମାଳେ ଶୁଭ ତୋରଣ ମଣ୍ଡିତ

ଆତସବାଜିର ଶବଦରେ କର୍ଣ୍ଣ ହୁଏ ସ୍ତବ୍‌ଧ ।

ଥାଟ ଦିଶଇ ସୁମନୋହର ଆଖି ଫେରେ ନାହିଁ

ଗଣପତି ହେରମ୍ବ ଅଛନ୍ତି ଥାଟ ପରେ ରହି ।

ସେଲାଗି ଥାଟ ସୌନ୍ଦର୍ଯ୍ୟ ହୁଏ ଆହୁରି ବର୍ଦ୍ଧିତ 

ବ୍ରାହ୍ମଣଙ୍କ ବେଦମନ୍ତ୍ରପାଠ ହୁଏ କର୍ଣ୍ଣପାତ ।

ଘଣ୍ଟଘଣ୍ଟା ଶଙ୍ଖନାଦେ ହରିବୋଲ ହୁଳହୁଳି 

ମୃଦଙ୍ଗ ଭେରୀ ତୂରୀରେ ଥାନ ପଡ଼ଇ ଉଚ୍ଛୁଳି ।

କେତେ ଭୋଜିଭାତ ମହୋତ୍ସବ ହୋଇଥାଏ ଖଞ୍ଜା

ପବିତ୍ର ଦିବସ ଆଜି ଏଇ ଗଣପତି ପୂଜା ।

ବିଦ୍ଯାଦାତା ବିଦ୍ଯା ଦିଅ ଦିଅ ପ୍ରଭୋ ଯଶ ଆୟୁ

ଏହିପରି ଆନନ୍ଦ ଯେ ସଦା ଲାଗି ରହିଥାଉ ।

ନରହୁ ବିଘ୍ନେଶ କେବେ ଜାତି ବର୍ଣ୍ଣର ବିଭେଦ

ଭାଈଚାରାରେ ଆପ୍ଯାୟିତ ହେଉ ଏଇ ଜଗତ ।

ପରସ୍ପର ସ୍ନେହ ସମ୍ପର୍କର ଏ ଅକ୍ଷୁର୍ଣ୍ଣ ସୂତ୍ର 

ନହେଉ କେବେ ଛିନ୍ନ ଏଇ ସୂତ୍ର ଅମ୍ବିକା ସୂତ ।

ଶ୍ରୀ ଗଜାନନ ପଦେ ମୋହର କୋଟିଏ ପ୍ରଣାମ

ଦୀନଦୁଃଖୀ ଶିବ ତବ ପଦ କରୁଛି ବନ୍ଦନ ।

ଦୟା କର ଦୟାମୟ ଗିରିରାଜ ସୁତା ସୁତ

ଚଲାପଥ ସର୍ବଦା ମୋହର ହେଉ କୁସୁମିତ ।

ଭାଟପଡ଼ା , ନିରାକାରପୁର , କଣାସ , ପୁରୀ