ଦୁର୍ଗା ନାମ ସ୍ତୁତିକା

କାବ୍ଯଭୂଷଣ ଶିବ ପ୍ରସାଦ ବାହିନୀପତି 

ଅଇରୀ ବଇରୀ ନାଶିନୀ ଦେବୀ କାଳିକା

ଆଶିଷ ଦାୟିନୀ ଦୁର୍ଗତି ନାଶିନୀ ଦୁର୍ଗା ।

ଈଶ୍ବର ପ୍ରାଣବଲ୍ଲଭୀ ଗିରିଜା ଦୁଲ୍ଲଣୀ

ଈଶ୍ବରୀ ତୁ ମହାମାୟୀ ଦନୁଜ ନାଶିନୀ । 

ଉମା ମାହେଶ୍ୱରୀ ପାର୍ବତୀ ଅମ୍ବିକା ମାତା

ଉଗ୍ରରୂପା ଉଗ୍ରସେନୀ ବିମଳା ଚଣ୍ଡିକା ।

ଋଷିଗଣ ବନ୍ଦିତା ଆରୁଷିନେତ୍ରା ଋଦ୍ରା

ଋକ୍ଷନେତ୍ରା ମହାମାୟୀ ଦଶଭୁଜା ଭଦ୍ରା ।

ଏମନ୍ତେ କେତେ ତୋ' ନାମ ଦେଇଗଲେ ବ୍ରହ୍ମା

ଐଶ୍ୱରିକ ଶକ୍ତି ସମ୍ପର୍ଣ୍ଣା ଋଦ୍ରଙ୍କ ବାମା । 

ଓଁକାର ରୂପିଣୀ ସତ୍ଯ ଶାନ୍ତି ଦୟା କ୍ଷମା

ଔଜ୍ଜ୍ୱଲ୍ୟ ବିବର୍ଦ୍ଧିନୀ ତୁ ମାତା ଅନ୍ନପୂର୍ଣ୍ଣା ।

କମଳ ଦଳ ନିବାସିନୀ ଶ୍ରୀଦେବୀ ଲକ୍ଷ୍ମୀ

ଖ୍ଯାତି ଅରଜିଛୁ ମାଆ ଘରେ ଘରେ ପୁଣି ।

ଗରବ ଗଞ୍ଜନୀ ବୋଲି ପଡୁଅଛି ଡାକ

ଘୋର ସଙ୍କଟୁ ମତେ ଉଦ୍ଧାର ଆଦିମାତ ।

ଚଣ୍ଡ ମୁଣ୍ଡ ନିପାତିନୀ ଅଭୟ ଦାୟିନୀ 

ଛିନ୍ନମସ୍ତା ରୂପେ ପିଉ ନିଜ ଲହୁ ପୁଣି ।

ଜଗଦମ୍ବା ଜାଗେଶ୍ବରୀ ଜଗତ ତାରିଣୀ 

ଝରିଯାଏ ଅଶ୍ରୁ ମୋର ସାଜି ନିର୍ଝରିଣୀ ।

ଟହଟହ ହସେ ମା'ଗୋ କମ୍ପାଉ ମେଦିନୀ

ଠକ ସଂସାରରେ ମାଆ ଥକି ମୁଁ ଗଲିଣି ।

ଡମ୍ବରୁ ଧାରିଣୀ ମାଆ ଅର୍ଦ୍ଧଚନ୍ଦ୍ରଚୂଡ଼ା

ଢ଼ପଢ଼ପ ଚାଲିରେ ତୋ' ଥରଇ ବସୁଧା ।

ତୁ କମଳା ତୁ ବଗଳା ତୁ ମାତଙ୍ଗୀ ଶିବା

ଥାଉ ତୁହି ସର୍ବରୂପେ ସବୁଠାରେ ମାତା । 

ଦୈତ୍ଯ ସଂହାରି ମାଆ ତୁ ରଖିଲୁ ଅବନୀ

ଧୂମାବତୀ ରୂପେ ତୁ ମହାଭୟଙ୍କାରିଣୀ ।

ନମସ୍ତେ ମଙ୍ଗଳା ମା'ଗୋ ମଙ୍ଗଳ କାରିଣୀ

ପ୍ରଣମେ ତୋ' ପାଦ ଶିବ ରଖ ଲୋ ଜନନୀ ।

ଫୁଲ ମଧ୍ଯେ ରକ୍ତଜବା ଅତି ପ୍ରିୟ ତୋର

ବନସ୍ତେ ବନଦୁର୍ଗା ବନେ କରୁ ବିହାର ।

ଭଣଇ ମୁଁ ଶିବ ପ୍ରସାଦ ବାହିନୀପତି 

ମମ ଦୋଷ କ୍ଷମା କର ଥିଲେ କିଛି ତ୍ରୁଟି ।

ଯାହା ମୁଁ ଜାଣିଛି ମାଆ କରିଲି ବଖାଣ

ରଖ ମୋତେ ତୋର ପାଦେ ଗଲି ମୁଁ ଶରଣ ।

ଶିବାନୀ ଭବାନୀ ରଖ ପଣତ ଘୋଡ଼ାଇ

ଷଡ଼ରୀପୁ ମର୍ଦ୍ଦନୀ ଲୋ ଦୋଷ ଧର ନାହିଁ ।

ସଖା ସହୋଦର ମୋର ନାହିଁ ବନ୍ଧୁ ବଳ

ହଟ କର ନାହିଁ ସ୍ଥାନ ଦିଅ ପାଦତଳ ।

କ୍ଷମା ଦାୟିନୀ ଜନନୀ କ୍ଷମା ଦିଅ ମୋତେ 

ଲକ୍ଷ୍ଯହୀନ ପୁତ୍ର ପଥ ଦେଖାଅ ତୁରିତେ ।

ପ୍ରତିଷ୍ଠାତା/ମୁଖ୍ୟ ସମ୍ପାଦକ - ସୁଦେଷ୍ଣା ପ୍ରମୋଦ ସାହିତ୍ଯ ସଂସଦ 

ଭାଟପଡ଼ା , ନିରାକାରପୁର , କଣାସ , ପୁରୀ 

ଯୋଗାଯୋଗ - ୮୨୪୯୭୭୨୩୬୧