ଶରତ ଆସିଲେ

କାବ୍ଯଭୂଷଣ ଶିବ ପ୍ରସାଦ ବାହିନୀପତି 

        ସମ୍ପାଦକ - ଉଦୟ ଭାନୁ 

ଶରତ ଆସିଲେ ଧରାକୁ ଓହ୍ଲେଇ

କାଶତଣ୍ଡୀ ପୁଷ୍ପେ ହସୁଥାଏ ମହୀ ।

ହସେ ପାରିଜାତ ହେନା ଜୂଈ ଜାଇ

ଶେଫାଳୀ କୁସୁମ ବାସ ଚହଟଇ ।୧

ମୃଦୁମନ୍ଦ ବାଆ ପଡୁଥାଏ ଝରି

ଶୀତଳ ସମୀର ମନ ନିଏ ହରି ।

ନଥାଏ ବରଷା ନଥାଏ ତ ଝଡ଼ି

ପୀତ ଜହ୍ନିଫୁଲ ହସେ ଖିଲିଖିଲି ।୨

ଖଣ୍ଡି ଧଳାମେଘ ଅମ୍ବର ପ୍ରଦେଶେ

ଭାସିବୁଲେ ବହୁତ ସୁନ୍ଦର ଦିଶେ ।

ଶସ୍ଯ ଶ୍ଯାମଳା ମହୀ ଆନନ୍ଦେ ହସେ

ନଦୀ ପୋଖରୀ ଜଳ ନିର୍ମଳ ଦିଶେ ।୩

ଦୂର ଦିଗ୍‌ବଳୟେ ପଶ୍ଚିମାକାଶେ

ଅସ୍ତଗାମୀ ଭାସ୍କର ଶୋଭା ପରଷେ ।

ସ୍ବଚ୍ଛ ପରିମଳ ଶରତ ଆକାଶେ

ଶଶଲାଞ୍ଛିତ ଶୁଭ୍ର ଜୋଚ୍ଛନା ବର୍ଷେ ।୪

ଜଳେ ହସଇ କୌମାରୀ ନୀଳ କଈଁ

ଏକଲୟେ ତା'ର ପ୍ରେମିକକୁ ଚାହିଁ  ।

ମଥା ହଲେଇ ଜଳେ ଡାକଇ ସେହି

ମୋ' ପାଶେ ପ୍ରିୟ ତୁମେ ଆସ ଓହ୍ଲେଇ ।୫

ଭାଦ୍ରବ ଆଶ୍ବିନ ଦୁଇଗୋଟି ମାସ

ଶରତ ଆସୁଥାଏ ପ୍ରତି ବରଷ ।

ଧରାରେ ଓହ୍ଲାନ୍ତି ଶ୍ରୀମାନ ଗଣେଶ 

ଷଷ୍ଠୀ ଓଷାରେ ଖେଳିଯାଏ ଉଲ୍ଲାସ ।୬

ଭାଦ୍ରବ ମାସେ ପଡ଼େ ଅନନ୍ତ ବ୍ରତ

ଶରତେ ଏଇ ପର୍ବ ଅଟେ ବିଖ୍ଯାତ ।

ବଡ଼ ଧାର୍ମିକ ଏଇ ଋତୁ ଶରତ

ସ୍ବଚ୍ଛ ସୁନିର୍ମଳ ଦିଶଇ ଜଗତ ।୭

ଶରତ ଆଣିଛି ସାଥିରେ ତାହାର

ଶାରଦୀୟ ଦୁର୍ଗାପୂଜାର ସମ୍ଭାର ।

କୁମାର ପୂର୍ଣ୍ଣିମା ପୂଜା ଉପହାର

ଋତୁକୁ କରଇ ସବୁଠୁ ସୁନ୍ଦର  ।୮

ଶରତ ଋତୁ ଯେବେ ବିଦାୟ ନେବ

ଯେତେ ପୂଜା ପାର୍ବଣ ଫିକା ପଡ଼ିବ ।

ହେମନ୍ତ ଋତୁ ଯେବେ ହେବ ପ୍ରବେଶ 

ଧିରେ ପାଦ ପକେଇ ବଢ଼ିବ ଶୀତ ।୯

ଭାଟପଡ଼ା , ନିରାକାରପୁର , କଣାସ , ପୁରୀ