ମିଛେ ବଖାଣୁ ଆମେ ଓଡ଼ିଆ

କାବ୍ଯଭୂଷଣ ଶିବ ପ୍ରସାଦ ବାହିନୀପତି 

ମୁଁ ଓଡ଼ିଶା ମାଟିର ସନ୍ତାନ 

ଖାଣ୍ଟି ଓଡ଼ିଆ ପୁଅଟିଏ ମୁଁ

ମୋ' ସଂସ୍କୃତି ଓ ମୋ' ପରମ୍ପରା

ମୋ' ପାଇଁ ବଡ଼ ମୋ' ସ୍ବାଭିମାନ ।

ମୁଁ ସମ୍ମାନ ଦିଏ ଓଡ଼ିଆଙ୍କୁ 

ସମ୍ମାନ ଦିଏ ମୋ' ସଂସ୍କୃତିକୁ 

ଯଥୋଚିତ ସମ୍ମାନ କରେ 

ମୋ' ଓଡ଼ିଆ ଜାତିର ପରମ୍ପରାକୁ ।

ଜାତି ଧର୍ମ ବର୍ଣ୍ଣ ନିର୍ବିଶେଷେ

ସମସ୍ତେ ଏକ୍‌ର ମନ୍ତ୍ର ଗାନ କରେ

ଓଡ଼ିଆ ଦେବାଦେବୀଙ୍କୁ ଭକ୍ତି କରେ

ସାମାଜିକ ସଂସ୍କାର ବଜାୟ ରଖେ ।

ହେଲେ ଏ କ'ଣ ଦେଖୁଛି ଆଜି !

ସଂସ୍କୃତି ଓ ପରମ୍ପରାର ବିଲୋପ !

ଓଡ଼ିଶା ମାଟିରେ ଓଡ଼ିଆ ସଂସ୍କାର

ଓଡ଼ିଆଙ୍କ ହାତେ କଳୁଷିତ ଆଜି !

ଅଶ୍ଳୀଳତାରେ ପରିପୂର୍ଣ୍ଣ ସମାଜ

ଜାତିଆଣ ଭେଦଭାବ ଏବଂ

ଅସ୍ପୃଶ୍ୟ ଅସ୍ପୃଶ୍ୟ ସମ୍ବୋଧନ !

ଦେବାଦେବୀ ବି ଉପହାସର ପାତ୍ର !

ଅନ୍ଯାୟ ଅସତ୍ୟ ଅଧର୍ମ ପାଖରେ

ଆଜି ମୋ' ସଂସ୍କୃତି ବଳି ଭୋଜ୍ଯ ;

ସମସ୍ତ ଦ୍ରଷ୍ଟା ସ୍ରଷ୍ଟା ନିରବ

କହିବାର ଯୁ ନାହିଁ କାହାର ।

ସେବକ ନିରବ ପୂଜକ ନିରବ

ନିରବ ବିଜ୍ଞାନୀ ଆଧ୍ୟାତ୍ମିକବାଦୀ

ନିରବ ରକ୍ଷକ ଓ ସମାଲୋଚକ 

ନିରବ ବଦାନ୍ୟ ବିଦ୍ବାନ ମଣ୍ଡଳୀ ।

ରକ୍ଷକ ହୋଇ ବି ଭକ୍ଷକ ସାଜନ୍ତି

ଜାଣି ସ୍ବାଭିମାନ ବିନାଶ କରନ୍ତି 

ବାଡ଼ ଯଦି କେବେ ଫସଲକୁ ଖାଏ

କାହାକୁ ବା ଏଠି ଦୋଷ ଦେବ କିଏ ?

ଲାଜ ନାହିଁ ଯାହା ଆମରି ମୁହଁକୁ 

ସ୍ବାଭିମାନୀ ଯାହା ଲୋକ ଦେଖାଣିଆ 

ସଂସ୍କାର ସଂସ୍କୃତି ଗଲାଣି ଚୁଲ୍ଲାକୁ

ମିଛେ ବଖାଣୁ ସିନା ଆମେ ଓଡ଼ିଆ ।

ପ୍ରତିଷ୍ଠାତା/ମୁଖ୍ୟ ସମ୍ପାଦକ - ସୁଦେଷ୍ଣା ପ୍ରମୋଦ ସାହିତ୍ଯ ସଂସଦ 

ଭାଟପଡ଼ା , ନିରାକାରପୁର , କଣାସ , ପୁରୀ 

ଯୋଗାଯୋଗ - ୮୨୪୯୭୭୨୩୬୧