ସଂଘର୍ଷ

            କାବ୍ଯଭୂଷଣ ଶିବପ୍ରସାଦ ବାହିନୀପତି

                       ସମ୍ପାଦକ - ଉଦୟ ଭାନୁ 

ସଂଘର୍ଷ ;

ପରସ୍ପର ମଧ୍ଯେ ଘର୍ଷଣ 

ସଂଘବଦ୍ଧ ଆକ୍ରମଣ 

ଶୂନ୍ଯ ହସ୍ତେ ଯୁଦ୍ଧ ।

ଯାହା ମୋ ଜୀବନରେ ଚାଲିଛି 

ପ୍ରତି ମୁହୂର୍ତ୍ତରେ ଅହରହ 

କରିଚାଲିଛି ସଂଘର୍ଷ 

ଜନ୍ମ ସମୟରୁ ଏଯାବତ୍ ।

ନା ପାଇଛି ମାଆର ମମତା 

ନା ମିଳିଛି ପିତୃ ପ୍ରେମ ମୋତେ ;

ଜନ୍ମରୁ ଯନ୍ତ୍ରଣା ଜର୍ଜରିତ 

ଜତୁ ଗୃହେ ସଢ଼ୁଛି ଜୀବନ ।

ଜନ୍ମରୁ ମୁଁ ଯୌବନ ପର୍ଯ୍ୟନ୍ତ

ଯେଉଁ ସବୁ ପରିସ୍ଥିତିକୁ

ସମ୍ମୁଖୀନ ହୋଇଛି ସେସବୁ

କେତେ ଦୁଃସହ୍ଯ ମୁଁ ହିଁ ଜାଣେ ।

ମୁଁ ଜମା ନିଃସଙ୍ଗ ନୁହେଁ,

ମୋ ସହିତ ଅଛନ୍ତି ଲୁହ କୋହ ଯନ୍ତ୍ରଣା 

ଅଙ୍ଗାଙ୍ଗୀ ଭାବେ ଜଡିତ ଏମାନେ

ଆଜି ଯାଏଁ ସ୍ଥଗିତ ହୃଦ କନ୍ଦରେ ।

ଏହି ତିନି ଜଣଙ୍କ ନିମିତ୍ତ 

ପ୍ରତି ମୁହୂର୍ତ୍ତେ ପ୍ରତି କ୍ଷଣେ ଚାଲିଛି

ଖୁସି ସହିତ ମୋର ସଂଘର୍ଷ  ;

ବତିଶି ବର୍ଷ ବିତି ଗଲାଣି ।

ଜିଣିବା ପାଇଁ ସଂଘର୍ଷ କରି

ଅକାରଣେ ପରାଜୟତା ସ୍ବୀକାର 

ମୁଁ ତ କେବଳ ହରେଇବା ଶିଖିଛି

ପାଇନି କି ପ୍ରାପ୍ତି ଆଶା ବି ରଖିନି ।

ଜଣଙ୍କ ପରେ ଜଣେ ଆତ୍ମୀୟ 

କେଉଁ ଅଭିମାନରେ ଜାଣିନି 

ନିଃସଙ୍ଗ ସଜେଇ ଚାଲିଗଲେ ମତେ 

ମାତ୍ର ଗୋଟିଏ ବର୍ଷ ବ୍ଯବଧାନରେ । 

ତଥାପି କଦାପି ଭାଙ୍ଗି ମୁଁ ପଡିନି

ଏକାକୀ ଜୀବନର ସଂଘର୍ଷ 

ଏବେ ବି ଜାରି ରହିଛି ମୋର

ଚେଷ୍ଟିତ ମୁଁ ଏକା ବଞ୍ଚିବାକୁ ।

ଉଦରର କ୍ଷୁଧା ଯନ୍ତ୍ରଣାର 

ଉପଶମ ପାଇଁ ଆଉ ସଂସାରରେ 

ବଞ୍ଚି ରହିବାକୁ ସଂଘର୍ଷ କରିଛି

ଅନ୍ୟ ଆଗେ ହାତ ପାତି ମୋର ।

ହସିବାର ଅଭିନୟ କରି

ଆଉ କାହା ଓଠେ ହସ ଟିକେ ଦେଖି

ମିଛ ଖୁସି ହେବାର ପ୍ରୟାସ 

ମୋ ଜୀବନର ଏକ ବଡ ସଂଘର୍ଷ ।

ପ୍ରତୀୟମାନ ହେଉଛି ମୋତେ

ଏମିତି ଲାଗୁଛି ଯେମିତି କି

ସଂଘର୍ଷମୟ ଜୀବନ ମୋର

ଯାହାର ନାହିଁ ପରିସମାପ୍ତି ।

ପ୍ରତିଷ୍ଠାତା / ମୁଖ୍ଯ ସମ୍ପାଦକ - ସୁଦେଷ୍ଣା ପ୍ରମୋଦ ସାହିତ୍ଯ ସଂସଦ 

ଭାଟପଡା,ନିରାକାରପୁର କଣାସ (ପୁରୀ )

ଫୋ- ୮୨୪୯୭୭୨୩୬୧