ସ୍ମୃତି ସୁଗନ୍ଧ

କାବ୍ଯଭୂଷଣ ଶିବ ପ୍ରସାଦ ବାହିନୀପତି 

         ସମ୍ପାଦକ - ଉଦୟ ଭାନୁ 

ମନ କଲମରେ       କୋହର କାଳିରେ

       ଲେଖିଲି ଶେଷ କବିତା

ଇଚ୍ଛା ହେଲେ କେବେ     ନିଶ୍ଚିତ ପଢ଼ିବେ

         ଶବ୍ଦରେ ସଜ୍ଜିତ ବ୍ଯଥା ।

   ଜନମ - ମରଣ       ନିୟତି ନିଦାନ

           କରିବ କେ' ତାକୁ ଆନ

ଦୁଃଖ ନ କରିବ       ଯେବେ ବି ଶୁଣିବ

        ଶରୀରେ ନାହିଁ ମୋ' ପ୍ରାଣ ।

ସୁଖ ମୋ' ଜୀବନେ     ଆସିନାହିଁ ଦିନେ

            ଜନମୁ ଯନ୍ତ୍ରଣାସିକ୍ତ

   ଅଭିନୟ କରି       ଏଯାଏଁ ବଞ୍ଚିଲି

           କାହାକୁ କରିନି ବ୍ଯକ୍ତ ।

   ମୋର ରକ୍ତ ଯିଏ       ଶତ୍ରୁ ସମ ସିଏ

          ଦୁଃଖ ଦେଲେ ଆଜୀବନ

ମୋତେ ଯେବେ ପର       କଲା ଆପଣାର

           ଭିଡ଼ି ନେଲେ ଜନ୍ତୁରାଣ ।

     ମିତ୍ରଟିଏ ହୋଇ       ଥିଲା ଯିଏ ରହି

             ପିତୃ ପରି ସ୍ନେହ ଯା'ର

ସହି ପାରିଲେନି        ନେଲେ ତାକୁ ଟାଣି

             କପଟିଆ ଦଣ୍ଡଧର ।

   ମାଆଟିଏ ହୋଇ       ଥିଲେ ଯିଏ ରହି 

             ମନ ଯା' ମମତା ନଈ

     ଦଇବ ଦାରୁଣ       ଦେଲାଟି କଷଣ

           ମୋ' ଠାରୁ ଛଡ଼ାଇ ନେଇ ।

    ଭଉଣୀର ସ୍ଥାନ        କଲା ଯେ' ପୂରଣ

             ତାକୁ ବି ଦଣ୍ଡିଲେ ଦେବ

   ପ୍ରାଣ ଠାରୁ ବେଶି        ଦେଲା ଯିଏ ଖୁସି

             ସିଏ ବି ସାଜିଲା ଶବ । 

      ଦୁଇ ମନ ଦୁଇ        ପ୍ରାଣ ମିଶିଯାଇ

           ପ୍ରେମ ଯେବେ ଜନ୍ମ ନେଲା

    ବିଭୁ ତ ବଇରୀ       ବନିଲେ ମୋହରି

            ଅକାଳେ ସେ ଝଡ଼ିଗଲା ।

ନୈରାଶ୍ଯ ବାଦଲେ       ମୋ' ମୁଖମଣ୍ଡଳେ

             ମଳିନତା ପ୍ରକାଶିଲା

   ଅଭିଶପ୍ତ ବୋଲି       ଆପେ ଜାଣିଗଲି

             ବିତୃଷ୍ଣା ଭାବ ଜାଗିଲା ।

     ସସ୍ର ଚେଷ୍ଟା କରି       ନପାରିଲି ମରି

              ନଭକ୍ଷିଲା ଲୌହାସୁର

      ହଳାହଳ ବିଷ       କଲା ନାହିଁ ନାଶ

            ପିଣ୍ଡରୁ ପରାଣ ମୋର ।

    ଯାହା ଦେଇଥିଲେ       ସବୁ ଛଡ଼ାଇଲେ

              ଆଉ ବା ରହିଲା କିସ

      ରଖିଅଛ କାହିଁ       ଆହେ ଭାବଗ୍ରାହୀ 

             ପ୍ରାଣ ମୋ' କର ବିନାଶ ।

   ଟେକି ଦେଲି ହାତ       ରଖ ଜଗନ୍ନାଥ

           ନିଅ ମୋତେ ପାଶେ ବରି

    ଜୀବନ ଦୀପର       ସଳିତାଟି ମୋର

            ଧିରେ ଧିରେ ଆସେ ସରି ।

   ଯଦି ଦଲକାଏ         ବାଆ ବହିଯାଏ 

           ଦୀପଟି ମୋ' ଲିଭିଯିବ

     ସନ୍ତକଟି ଏଇ        ଥିବ ମୋର ରହି

            ମୋତେ ମନେ ପକାଇବ ।

କେହି ଜଣେ ଥିଲା        ଲେଖି ଚାଲିଥିଲା

          ଭଲ ହେଉ ଅବା ମନ୍ଦ

 ଭାବିବ ମନରେ       ନାହିଁ ସେ ମହୀରେ

           ଅଛି ତା' ସ୍ମୃତି ସୁଗନ୍ଧ । 

ପ୍ରତିଷ୍ଠାତା/ମୁଖ୍ଯ ସମ୍ପାଦକ - ସୁଦେଷ୍ଣା ପ୍ରମୋଦ ସାହିତ୍ଯ ସଂସଦ 

ଭାଟପଡ଼ା,ନିରାକାରପୁର , କଣାସ , ପୁରୀ 

ଫୋ - ୮୨୪୯୭୭୨୩୬୧