ଏ ତ କଳିକାଳ ରୀତି

 

ଏ ତ କଳିକାଳ ରୀତି

            

   କାବ୍ଯଭୂଷଣ ଶିବ ପ୍ରସାଦ ବାହିନୀପତି 

           ମାଇଲି ଖପରାକାତି 

କହିବାକୁ ମତେ     ଲାଜ ଲାଗେ ଏତେ

           କୁଆଡ଼େ ସମାଜ ଗତି । 

         ପାନରୁ ଖସିଲା ଚୂନ

ନିର୍ଲଜ ହାତରେ      ସଂସ୍କୃତି ବିପନ୍ନ 

      ସାହିତ୍ୟେ ରହୁନି ମାନ ।

            ରଜ ଦୋଳି କଟମଟ 

ଲବି କରି କବି     ହୋ'ନ୍ତି ଖୋବାଖୋବି

         ରାଜନୀତି ଭୁଲେ ରାଟ । 

        ତେଲିଆ ମୁଣ୍ଡରେ ତେଲ

ସାଧାରଣ ଜ୍ଞାନ      ହୀନ ହେଲା ଜନ

          କାଳକୁ କରୁଛି ଗେଲ ।

          ପଇଡ଼ ଭିତରେ ପାଣି

ମାଆ ଭଉଣୀର     ଜ୍ଞାନ ନାହିଁ ଯା'ର 

       ସିଏ କି ବୋଲିବ ବାଣୀ । 

        ବାଞ୍ଝଟି ଖୋଜଇ ବାଳ

ଜନନୀକୁ ଆଣି     ଉଲଗ୍ନ କଲେଣି

        ଅକାଳ କୁଷ୍ମାଣ୍ଡ ଦଳ । 

       ଚ଼କେ ଗଲେ ବାରହାତ

ଜାଣି ଆମନ୍ତ୍ରଣ     କଲେଣି ମରଣ

      ମିଛ ପାଖେ ବନ୍ଧା ସତ ।

       ଛକା ଖୋଜେ ରତି ସୁଖ

ସତୀ ଚ଼ରିତ୍ରରେ     ଅସତୀ ହଜାରେ 

         ବଖାଣି ହୁଏନି ଦୁଃଖ । 

        କଥାରେ କିଣନ୍ତି ହାତୀ

ଜନକ ନନ୍ଦିନୀ     ସତୀ ନୁହେଁ ଜାଣି 

        ଘୂରାଇ ଦେଉଛି ମତି ।

       ଖଡ଼ି ଯାଏ ଗଡ଼ି ଗଡ଼ି 

ରାମଚ଼ନ୍ଦ୍ର ପୁଣି     ସ୍ବାର୍ଥପର ଜାଣି

        ହୃଦୟ ହୁଅଇ ଫାଡ଼ି । 

         ସରଗକୁ ନାହିଁ ଶିଡ଼ି

ରୂପ ଯଉବନ       କିଣି ନିଏ ମନ 

     ଲାଗେ ଲମ୍ବା ଲମ୍ବା ଧାଡ଼ି । 

            ସରଗୁ ଅଇଲା ପରୀ

ଟୋକୀ ତ ଗୋଟିଏ     ପାଗଳ ପରାୟେ

        ଟୋକା ଯେତେ ଧରାଧରି ।

        ଘାଇଁ ଘାଇଁ ବୁଲେ ପଙ୍ଖା

 ପାତିବ୍ରତ୍ୟ ଥିଲେ      ସୁନ୍ଦର ଦିଶଇ 

          ହାତକୁ ବଜର ଶଙ୍ଖା !

ପ୍ରତିଷ୍ଠାତା/ମୁଖ୍ଯ ସମ୍ପାଦକ - ସୁଦେଷ୍ଣା ପ୍ରମୋଦ ସାହିତ୍ଯ ସଂସଦ 

ଭାଟପଡ଼ା ,ନିରାକାରପୁର , କଣାସ (ପୁରୀ)

       ସମ୍ପର୍କ - ୮୨୪୯୭୭୨୩୬୧