ହୃଦୟ ହଜେଇ ଖୁସିରେ କାନ୍ଦୁଛି

 

ପଶୁପତି ବିନତି

          କାବ୍ଯଭୂଷଣ ଶିବ ପ୍ରସାଦ ବାହିନୀପତି 

ପଶୁପତି ବାରେ ଘେନ ମୋ'  ମିନତି

  ପ୍ରାଣ ମୋ' ହରିନିଅ ମିଳୁ ମୁକତି ;

          ବଞ୍ଚିବାକୁ ଇଚ୍ଛା ନାହିଁ 

          ମରିବାକୁ ଚାହେଁ ମୁହିଁ 

ଆଉ ମୋର ନାହିଁ ସହିବା ଶକତି....... ୧।

ଏଇ ସଂସାରଟା ଗୋଟେ ଜଉଶାଳ 

 ଜୀବନକୁ ଜାଳେ ଯନ୍ତ୍ରଣା ଅନଳ ;

     ଅଦୋଷରେ ଦୋଷୀ ହେଲି

          ବଞ୍ଚିଥାଇ ନିତି ମଲି

ତୁଟିଲାଣି ନିଜଠୁ ନିଜର ପ୍ରୀତି....... ୨।

   ମିଛ ଦୁନିଆ ମିଛ ଭାବ ପ୍ରବଣ

ଲୋଭ-ମୋହ ସବୁରି ଅଙ୍ଗ ଭୂଷଣ ;

       ସରବେ ସ୍ବାର୍ଥେ ନିପୁଣ 

        ଆପଣା ସାଜେ ଦୁର୍ଜନ

 ବଦଳି ଗଲାଣି ସବୁ ରୀତିନୀତି....... ୩।

   ଆଉ ଦୃଶ୍ଯ ହେଉନି ଶାଶ୍ବତ ପ୍ରେମ 

   କେହି ବୁଝେନା ଏଠି କାହର ମନ ;

           ଭରା ଯଉବନ ଦେଖି

           ସବୁ ଆଖି ଯାଏ ଲାଖି

 ବଢ଼ିଲାଣି ଏ ମରପୁରେ ଦୁର୍ନୀତି........ ୪।

  ଅହଂର କରାଳ ଛାୟା ଘୋଟିଛି ଏଠି

  ଧର୍ମ ଖଟୁଛି ଅଧର୍ମ ପାଖରେ ବେଠି ;

         ମଧୁ ଭାଷ୍ୟେ ଭରା ବିଷ

           ସମାଜ ସାରା କଳୁଷ

 ନାଶଯାଉ କଳିରେ କଂସ ରାଜୁତି..... ୫।

  ବନ୍ଧ ଭାଙ୍ଗି କୋହ ଆସେ ଉବୁକେଇ

   ଦୁର୍ଜନ ଦୌରାତ୍ମ୍ୟ ସହି ହେଉନାହିଁ ;

           ଆଉ ନପାରିବି ଦେଖି

          ନିଅ ମତେ ପାଶେ ଡାକି

  ଭୀତତ୍ରସ୍ତ ପ୍ରାଣେ କରୁଛି ବିନତି...... ୬।

ସମ୍ପାଦକ(ପ୍ରତିଷ୍ଠାତା) - ସୁଦେଷ୍ଣା ପ୍ରମୋଦ ସାହିତ୍ଯ ସଂସଦ 

    ଭାଟପଡ଼ା , ନିରାକାରପୁର , କଣାସ , ପୁରୀ

           ଯୋଗାଯୋଗ - ୮୨୪୯୭୭୨୩୬୧