ଭକ୍ତି ସୁମନ

କାବ୍ଯଭୂଷଣ ଶିବ ପ୍ରସାଦ ବାହିନୀପତି 

ଭଜେ ବାସୁଦେବ ହରି ଭକ୍ତିଭାବ ହୃଦେ ଭରି

ଭରା ସିନ୍ଧୁ ଭବ ବାରି ଭଲେ କି ହୋଇବି ପାରି ,

            ଭୁଲାମନ ଭୁଲି ଯାଉଛି ;

ଭକ୍ତିମାର୍ଗ ଜଣା ନାହିଁ ମତେ ନଦିଅ ମୁରୁଛି ।୧

ଭକତ ବତ୍ସଳ ବୋଲି ଭବେ ସିନା ପଡ଼େ ହୁରି

ଭାସି ଗଲି ଭବଜଳେ ଭଗବତ ନିଅ ତୋଳି ,

          ଭଉଁରୀ ଜାଲ କରେ ଧରି ;

ଭକ୍ଷଣାର୍ଥେ ଛକି ବସିଛି କାଳ ରୂପୀ ଶିକାରୀ ।୨

ଭକ୍ତ ପାଇଁ ଭଗବାନ ଭାରତେ ଏହି ପ୍ରମାଣ 

ଭକ୍ତ ଦୁଃଖ ନାଶି ଭବେ ଭକ୍ତାଗ୍ରାହୀଟି ଆପଣ ,

           ଭଜିଥିଲେ ଗଜ - ମୃଗୁଣୀ ;

ଭାବେ ବିହ୍ୱଳିତ ହୋଇ ତାଙ୍କୁ ନେଲେକ ଆପଣି ।୩

ଭଜିଲା ଦିନେ ପାଞ୍ଚାଳୀ ଭକ୍ତିଭାବ ମନେ ଭରି

ଭକ୍ତର ଅସହାୟତା ଭାବି ଉଭା ହେଲ ହରି ,

           ଭରିଦେଲ କୋଟି ବସନ ;

ଭଗାରିହସା ହୋଇଲେ ଦୁଃଶାସନ-ଦୁର୍ଯ୍ୟୋଧନ ।୪

ଭଗବାନ କୁହ ମୋତେ ଭାଲେ ମୋ' କଷଣ କେତେ

ଭବଦୁଃଖ ହର ମୋର ଭଜେ ବିଷ୍ଣୁ ଭକ୍ତିପୂତେ ,

            ଭଣୁଛି ମୁଁ କାବ୍ଯଭୂଷଣ ;

ଭାବଗ୍ରାହୀ ଘେନ ମୋର ଏଇ ଭକତି ସୁମନ ।୫

ପ୍ରତିଷ୍ଠାତା / ମୁଖ୍ୟ ସମ୍ପାଦକ - ସୁଦେଷ୍ଣା ପ୍ରମୋଦ ସାହିତ୍ଯ ସଂସଦ 

ଭାଟପଡ଼ା , ନିରାକାରପୁର , କଣାସ , ପୁରୀ