ମୁଁ ସଙ୍ଗୀତ ଦୁନିଆର ସାରସ୍ବତ ସାଧକ

       ଶିବ ପ୍ରସାଦ ବାହିନୀପତି 

ମୁଁ ସଙ୍ଗୀତ ଦୁନିଆର ସାରସ୍ବତ ସାଧକ

ସ୍ବର ସଂରଚନା ମୋର ଅମାପ ଅନେକ ;

     କେବେ ବିରହୀ ଗାୟକ 

    କେବେ ସାଜେ ମୁଁନାୟକ

କେବେ କେବେ ପୁଣି ଛଳନାର ଖଳନାୟକ । ୧

କେବେ ଭଗୀରଥ ହୋଇ ଘୋର ତପ ଆଚରେ

ଧୋଇବାକୁ ଧରିତ୍ରୀ ଚରଣ ଜାହ୍ନବୀ ନୀରେ ;

      କେବେ ଭକ୍ତ ପ୍ରବର

      କେବେ ନାସ୍ତିକ ନର

କେବେ କେବେ ମୁଁ ଗଜଲର ଗରିଷ୍ଠ ଗାୟକ । ୨

ସଙ୍ଗୀତର ସାତସୂରେ ବନ୍ଧା ମୋର ଜୀବନ

ସଙ୍ଗୀତର ସ୍ପର୍ଶ ପ୍ରାପ୍ତେ କଥା କହେ ପାଷାଣ ;

     କେବେ କାହା ହୃଦ ଜିଣେ

     କେବେ ବିଷ ବୀଜ ବୁଣେ

ସଙ୍ଗୀତର ଶାଶ୍ବତ ସ୍ବରେ ଗଢ଼ି ତୋଳେ ସମ୍ପର୍କ । ୩

ମୋ ସଙ୍ଗୀତେ ଦୃଶ୍ୟ କେବେ ଗିରି ବନ ନିର୍ଝର 

ନଦୀ ସରୋବର ଅପୂର୍ବ ପ୍ରକୃତି ସମ୍ଭାର ;

    କେବେ ମରେ କେବେ ମାରେ

    କେବେ ଜିତେ କେବେ ହାରେ

ଯେତେ ଭୁଞ୍ଜିଲେ ସରେନି ମୋ ସଙ୍ଗୀତର ଭୋକ । ୪

ସଙ୍ଗୀତ ମୋ ପାଇଁ ସରୁ ତଣ୍ଡୁଳର ଅନ୍ନ

ସେ ମିଷ୍ଟାନ୍ନ ବ୍ଯଞ୍ଜନ ଭୁଞ୍ଜି ରଖିଛି ମୋ ପ୍ରାଣ ;

       ତା' ବିହୁନେ ଏ ଜୀବନ  

       ନାହିଁ ମୋର ପ୍ରୟୋଜନ

ସଦା ରଖିବି ସାଇତି ତାକୁ ଜୀବନ ଯାକ । ୫ 

ସଙ୍ଗୀତ ଏମିତି ସୁରା ତା'ର ଅଜବ ନିଶା

କାହା ପାଇଁ ସେ ମନୋରଞ୍ଜନ ମୋ ପାଇଁ ପେଶା ;

     ସଙ୍ଗୀତ ମୋ ରକ୍ଷାସୂତ୍ର

    ସଙ୍ଗୀତ ମୋ ଖାଦ୍ୟ ବସ୍ତ୍ର 

ସଙ୍ଗାତ ମୋର ନବର ମୁଁ ସଙ୍ଗୀତ  ଭିକ୍ଷୁକ । ୬

ଭାଟପଡ଼ା,ନିରାକାରପୁର କଣାସ,ପୁରୀ